Enn mesaz imaziner a la nasion : seki mo ti pou dir si mo ti Premie Minis. Sa li enn refleksion personel, pa enn diskour ofisiel.
Mo bann konpatriot,
Azordi nou pei pe travers enn moman grav.
Mo kone ki ena lakoler. Mo kone ki ena lafreyer. Mo kone osi ki pandan boukou letan, boukou Morisien finn ena santiman ki zot problem pa pe rezoud.
Delo. Lavi ser. Ladrog. Insekirite. Aksidan lor nou bann sime. Difikilte pou nourir enn fami ek lavenir nou bann zanfan.
Mo pe dir zot zordi: mo finn tann zot.
Premie mo panse al Élodie, so fami ek tou dimounn ki finn soufer pandan sa bann dernie zour-la. Seki finn arive bizin fer lobjet enn lanket transparan. Pena cover-up. Si ena dimounn ki finn fer fot, zot pou reponn devan la zistis.
Me mo bizin dir enn lot kiksoz avek mem fermte.
Lakoler pa donn personn drwa brile, kokin, vandalize ouswa met lavi lezot dimounn an danze. Nou pou protez popilasion, nou bann fami, nou lekonomi ek nou pei.
Me mo pa pou fer krwar ki enn couvre-feu pou regle tou.
Couvre-feu kapav kalme enn sitiasion pandan enn moman. Li pa regle problem delo. Li pa fer pri manze bese. Li pa retir ladrog dan nou bann kartie. Li pa retabli konfians ant lepep ek gouvernman.
Asterla, bizin atak rasinn problem la.
Mo pou zwenn sindika, sekter prive, sosiete sivil, bann zenn ek bann sitwayen. Nou pou met lor latab bann vre problem ki pe afekte lavi dimounn.
Ek gouvernman pou rann kont piblikman lor seki li pe fer.
Mo demann zot pa les okenn dimounn servi zot lakoler pou detrir Moris.
Pa les politik, relizion ouswa kominote diviz nou.
Nou ena zis enn pei.
Ek zordi, mo responsabilite kouma Premie Minis li pa zis remet lord.
Mo responsabilite se remet konfians.
Konfians pa gagne avek bann diskour. Li gagne avek aksion, transparans ek rezilta.
Mo pou pran sa responsabilite-la.
Annou protez Moris.
Annou protez nou bann zanfan.
Ek annou rekonstrir nou pei ansam.
Bondie beni zot.
Bondie protez Moris.
Dave Kissoondoyal